МызкIы цIитIта Къарча-Черкес апны даъапI, йара йхъа дшапхьахуа апшта, «йгIамдауа абызшвадырыгIв» Тюрин Дмитрий.

– Сара сызпхьаз аъачIвагIала сфизикпI, Самара аэрокосмос университет сгIалгатI, – йхIвитI Дмитрий. – Ауаса сгIамдауа салагищтара йапшым ашIыпIаква рпны йбзазауата сзынйауа ауагIахъаква рыбызшваква сымаджьащахъвахатI, йалкIгIата – абыжьква. Сра адуней абызшваква рбыжьква зымгIва гIазырбауа фонематика алфавит аласцIатI.

Дмитрий абаза бызшва йымаджьащахъвата акIвпI Къарча-Черкес дшгIайыз.

– ЙыздыритI абаза бызшва афонетика швабыж йшалачпу, саргьи ауи схънахитI. Швабыж йсымаджьащахъвапI абаза бызшва апны хъвщардала йалу ажвагIаныршащагьи. Ауи акIвымкIвагьи ари абызшва зласымаджьащахъву адунейла атачIв бызшваква йъарылапхьадзу ахъазла акIвпI. «Алашара» адкIылара апны хвыдъа абаза бызшвала йшадрыпхьауа аныздыр акурсква сырхъысныс гвы счпан сгIайтI, – йхIвитI агIамдагIвы.

Тюрин Дмитрий асквш 2011 йгIашIарышвта дгIамдитI. Ауи апхъала агIамдара йгвы гьазыщтIамызтI. Петербург йбзазауа йыгIвзакI хын дахIвара атахъхатI сасра дйызцара ахъазла. Ауи амщтахь Дмитрий дджвыквнагатI.

– Питер апны ссасын сангIайхуаз автостопла сгIамгIвайсуан. Вологда апны сгIашIастI. Ауи агIан гвы счпатI «Ахьапщ гьагьа» сгIакIвшарныс. Ауи амщтахь КIавкIаз сгIатанагатI, уадыргIвана – Мараташварта Украина, Молдова… Абараса Питер сгIатыцIхищтара хIпныла сцахуата мгIва сыквыркIвапI. «АмгIвала» Россия шабгу, Прибалтики Туркменистани ракIвымкIва СССР йалаз ареспубликаква зымгIва, датшагьи адунейла къраль 22 сгIарыкIвшарныс сахадзахьатI, – йхIвитI Тюрин Дмитрий.

Дмитрий йшихIвахуала, дгIамдауищтара гIванзаджвыкI акIвпI мгIвахв йтира анатахъха. Абзазартаквагьи йрыквирыдзуа гьщардам.

– АгIамдагIвчва асасыртаква рпны йгьбзазум. Ащарда ауат азаджв азаджв йпны йгIанхитI. Йазалху асайтква аъапI ауат ъабадыруа йгьи агIанхара ауысла йъангIалуа, – йгIахIгвынйыргIвитI Дмитрий.

Тюрин Дмитрий дызлабзазуш ахча амальта йауала йгIайынхитI, йапшым ауысква йырхъйитI, ахIатлараква рынкъвгара акIвызтынгьи, агитация швъаква ршара акIвызтынгьи, зынгьи цирккI апны дынхатI. УыскI ъагIайауа апны рыцIа ауырата тшйыркъвитI.

Черкесск апны Дмитрий нхарта гьимаустI, ауаса «Алашара» апны абаза бызшвала апхьара агIвхъвыкI дырхъыснадзыкIьара араъа мызквакI дбзазарныс йгвыгъапI.