АНО «Алашара»  2019 шықәсазтәи аусура аихшьалақәа 

Алкаа хада

Жәларбжьаратәи аидҵа «Алашара»  2019 шықәсазтәи аусура анализ азуа алкаа ҟауҵар алшоит, есышықәса ауаажәларратә еиҿкаара имҩаҧнаго ауснагӡатәқәа ишрыдрыҧхьало хыҧхьаӡара рацәала ауаа. Иҳәатәуп уи алахәылацәеи ахәаҧшцәеи мацара шракәым, иҟоуп ауснагӡатәқәа реиҿкаараҟны хаҭала, хшыҩла, материалтә цхыраарала злагала ҟазҵо, зны-зынлагьы  «Алашара» адгыларала урҭ рхала еиҿыркаауеит.  Черкесск иҟоу АНО «Алашара» аофис анапхгаҩы Мурат Муков иҟаиҵо ахәшьарала, апартниорцәа рҟынтәи ироуа афинанстә цхыраареи ауснагӡатәқәа реиҿкаара аан хәыда-ҧсада имҩаҧгаз аусурақәа рыхәҧсеи еицуҵар иалҵуеит жә-миллион мааҭ инареиҳаны! Уи – Абаза жәлар рмилаҭтә фонд ала инагӡоу апроектқәа аламҵакәа.

«Алашара» иара анаҧҵаз инаркны позициас иааннакылоз зегьы еидгыланы аусеицура апринцип ақәныҟара акәын. «Алашара» иаҧсахӡом аҳәынҭқарратә структурақәа, урҭ аус рыцнауеит. Уи ирхианы аиланхарҭатә ҭыҧқәа ирызнанагаӡом ирҭаху зегьы, ауааҧсырагьы иаргьы еицырыӡбоит ҳаулқәа рҟны аҧсҭазаара аиӷьтәразы аҳасабтәқәа. Маҷ-маҷ ақыҭауаа рыхдырраҿы ишьақәгылоит рхатәы мчқәа рыла акы аҧҵаразы агәаҳәара.

– Аамҭа кьаҿк иалагӡаны иалыршахеит ауаа рыхдырраҿы аиҭакрақәа – убри ауп  «Алашара» фышықәсатәи аусураҿы лҵшәа хаданы иҟоу– иҳәоит уи азы, аиҿкаара ахада Мусса Екзеков. – Аха аҧхьаҟа ишьҭоуп, аусура ду, урҭ аиҭакрақәа еиҳагьы иубо иҟаларцаз.

Аамҭа игәанаҭахьеит

Есышықәса АНО «Алашара» апрограмма   иалашәоит, аиҿкаара анаҧҵаха инаркны еиҳа зҿлымҳара зуҭаша ауснагӡатәқәа. Раҧхьа иргыланы, хымҧада уахь иаҵанакуеит Абаза жәлар ркультура Амши Абаза жәлар Рыхәмаррақәеи. Есышықәса урҭ зхы рылазырхәуеи ирҭаауеи рхыҧхьаӡара иацлоит. Анаҧшцәа рыхәшьарақәа рыла, 2019 шықәсазы зегь реиҳа ауаарацәа злахәыз абазатә акультуратә, аспорттә ныҳәақәа ирҭааит 3000-ҩык инареиҳаны. Еиҳа еиӷьхоит урҭ ауснагӡатәқәа реиҿкаара ахаҭабзиареи, алҵшәақәеи. Убас, ҧасатәи азеиҧшмилаҭтә спорттә хәмаррақәа рҿы уаанӡатәи арекордқәа зегьы ирхысын.

Жәларбжьаратәи аидҵа «Алашара» иацнаҵоит ашәҟәқәа рҭыжьразы аусура, еиҭаҭнажьуеит аламала уаҩы иҧымло абаза авторцәа рҩымҭақәа, уаанӡа иҭыжьмыз ҭрыжьуеит. Хәыҷы-хәыҷла аларҵәара роуеит аспорттә еиндаҭларақәа «Айха хъацIа», амарафон маҷ, еиуеиҧшым акатегориақәа ирыҵаркуа рзы ашьапылампылтә турнирқәа – ахәыҷқәа рҟынтәи аспорт аветеранцәа рҟынӡа. АНО «Алашара» аҟны иаҧҵоу абаза бызшәазы агәыҧқәа, иҳаҩсыз ашықәс азы ирҭааит 142-ҩык, урҭ рахьтә 98-ҩык алагамҭатәи абазатәи курсқәа инагӡаны ирхысит, азшьақәагьы еихьӡарала ирҭиит. Итрадициатәу анаука-практикатә конференциа «Клычевтәи аҧхьарақәа», «Табуловтәи аҧхьарақәа» мҩаҧысит Аҧснынтәи аделегациа ду алахәхарала, абаза бызшәеи алитературеи рзы аконкурсқәа ракәзар,  200-ҩык инареиҳаны ашколхәыҷқәа алахәын. Аусура иацҵоуп амультфильмқәа абаза бызшәахь реиҭагаразы, ахыркәшарахь инеиуеит абаза бызшәала раҧхьатәи асахьаркыратә фильм аҧҵаразы  аусура. Аекологиатә акциа «Еиҭаҳа ухәышҭаараҵла» мҩаҧысит 2019 шықәсазы ҧшь-аулк рҿы – Старо-Кувинск, Ново-Кувинск, Инжич-Чукун, Ельбурган, урҭ рҟны еиҭаҳан 200 рҟынӡа аҧсаҵлақәа. Уаанӡеиҧш имҩаҧысуеит агәабзиара арӷәӷәареи, ани ахшареи ргәабзиара ахьчареи апропаганда рзуразы, абазашьҭрақәа рҭоурых аҭҵааразы, аҿартә еиҿкаарақәа рыҿиаразы, аекологиатә рыцқьарақәа реиҿкааразы, аграждантә аҧшьгарақәа рыдгыларазы аусурақәа, иара убас ақыҭатә актив аус рыцура аиуристтә цхыраара рыҭара.  АНО «Алашара» ацхыраарала аус руеит ахореографиатә кружокқәа Старо-Кувинск.

Абарҭқәа зегьы, егьырҭ есышықәса имҩаҧысуа ауснагӡатәқәа изышьцылоу акакәхеит, абазақәеи аҧсуааи рыбжьара Ҟарачы-Черқьес еиҧш, егьырҭ арегионқәа рҿгьы. Аҧхьаҟа еиҳа иалкаахо ауснагӡатәқәа мҩаҧыргалоит егьырҭ аҳәаанырцәтәи ҳдиаспора ахаҭарнакцәагьы алархәны.

Ахатәы бызшәа еснагь аҧыжәара амоуп

2019 шықәса АНО «Алашара» аусураҿы аҿыцрақәа рацәаны иаланагалеит. Апланқәа аус рыдуло ахырхарҭақәа рнапхгаҩцәа иааиҧмырҟьаӡакәа ирыҧшаауеит ауснагӡатәқәа рымҩаҧгаразы аинтерес зҵоу аформақәа, ҳаамҭазтәи атехнологиа рхы иархәаны иазгәаҭоу алҵшәақәа рынагӡаразы еиуеиҧшым аметодқәа. Абаза бызшәа аҟәша (Мурат Джандаров) ҵыҧхтәи ашықәс азы иусура хиркәшеит абазеи аҧсуеи бызшәақәа зҵо рыцхырааразы амобилтә гәылаҵа аҧҵаразы: аҧсуа-аурыс жәар, абаза анбан, аҧхьаӡага. Android азы хазы аус адулоуп Абаза жәлар рбызшәеи ркультуреи рдырразы атест.

– Арҭ агәылаҵақәа аус рыдулан уаанӡа аинформациатә технологиа аусхк аҿы абазатә специалистцәа рыбзоурала, урҭ ҳарҭеит хәыда-ҧсада Android, IOS рҟны рҭаҵаразы. Урҭ аусумҭақәа даара рыхә цәгьоуп, – иҳәеит Мурат Джандаров.

Ашколқәранӡеи ашколқәреи ирыҵаркуа ахәыҷқәа рзы иазырхиоуп адидактикатә хәмаррақәа, абаза бызшәахь ииалгеит ахәыҷбаҳча  «Алашара» (аул Псыж) аиҳабы Зурида Ашибокова. Урҭ рызшахоит абаза бызшәа ахьырҵо ахәыҷбаҳчақәа 11, ашколқәа 31.

Анаҩстәи ахәыҷбаҳча – «Аленушка» (аул Эльбурган) аиҳабы Оксана Аджиева инхарҭәааны аус адылулеит ашколқәранӡатәи аусҳәарҭақәа рҿы абаза бызшәа дырҵаразы аметодикатә хархәагақәа. Аҵарауаҩ қәыҧш Заира Джемакулова лакәзар, аус адылулеит ақалақьтә школқәа рзы абаза бызшәа аханатә аҵаразы Арҵаратә-методикатә комплекс. Асахьаҭыхҩы Амир Биджев сахьала еиқәиршәаз ари ашәҟәы аҭыжьра иаздырхиоит уажәы.

«Алашара» абызшәа дырҵаразы ацхыраара ахьыҟанаҵо Ҟарачы-Черқьес абаза аулқәа рҿы мацара акәым. Аиҿкаара ацхыраарала абаза бызшәазы аурокқәа мҩаҧысуеит Адыга-Ҳаблтәи алагарҭатә, Еркен-Шахартәи абжьаратә школқәа рҟны. «Алашара» арҵара-методикатәи, аблабаратә материалқәеи рыла еиқәнаршәоит Ставрополи Москвеи иҟоу абаза бызшәазы акружокқәа. Аҧхын 2019 шықәсазы Ҭырқәтәыла иҟоу  Акпынар ақыҭахь абаза бызшәазы азыҟаҵарақәа рымҩаҧгаразы ддәықәҵан Заур Лиев, ҩымзи бжаки рыҩныҵҟа иара иҿы аҽазыҟаҵара иахысит шәҩык инареиҳаны.

Ҳара иаҳҭахуп згәы бзиоу амилаҭ

Ауааҧсыра рмедицинатә маҵзура ахаҭабзиара аиӷьтәразы, аспорт аҽазыҟаҵаразы, агәабзиара арӷәӷәаразы аҭагылазаашьақәа раҧҵара – АНО «Алашара» аусураҿы аҧыжәара зырҭо ахырхарҭақәа иреиуоуп.

Убри инамаданы ипрецедентдоу азуҳәар алшоитАҧснытәи ауаажәларратә фонд  «Амшра», хаҭала уи анапхгаҩы Беслан Родион-иҧа Агрба ифинанстә цхыраарала, «Алашара» Ҟарачы-Черқьес имҩаҧнагаз акциа «Аонкологиатә чымазарақәа заатәи рдиагностика амчыбжь». Акциа адгылара арҭеит КЧР агәабзиарахьчара аминистрреи ареспубликатә онкологиатә центри. Мчыбжьык иалагӡаны жәларбжьаратәи аҩаӡара змоу, аҳақьымцәа Евразиатәи рфонд иалоу  ареспублика ауааҧсыра ргәабзиара ҭырҵаауан, иазыҟарҵон аҭыҧантәи аҳақьымцәа. Ргәабзиара ҭырҵааит 600-ҩык рҟынӡа ауаа, урҭ рахьтә 400-ҩык раҟара – абазатә аулқәа рынхацәа, 200-ҩык – егьырҭ аиланхарҭатә ҭыҧқәа рҟынтәи. Имҩаҧгаз акциа иалҵшәаны иаарҧшын онкологиатә чымазара змаз жәааҩык, 43-ҩык ибаргәым ачыра змаз. 15-ҩык апациентцәа аоперациа рызун акласс ҳаракы змоу аҧҟаҩцәа-аонкологцәа рыбзоурала, убарҭ рхыҧхьаӡараҿы – амедицинатә наукақәа рдоктор,  онкологиеи алучтә терапиеи ркафедра апрофессор, Блохин В.М ихьӡ зху Анаукатә Онкологиатә центр анаукатә усзуҩы хада Нечушкина. Аҧҟарақәа зегьы маншәаланы имҩаҧысит. Акциа иаҵанакит 35-ҩык аонкодиспансер аҳақьымцәа, 15-ҩык араионтә поликлиникақәа рҳақьымцәа, 18-ҩык амедицинатә усзуҩцәа, амедицинатә институт  СГТА астудентцәа.

Уаанӡа АНО «Алашара» «Амедицина»  аҟәша (Мадина Екзекова) аонкологиатә чымазара аарҧшразы алабараториатә-диагностикатә ҭҵаара еиҿнакааит аул Кара-Паго. Мызкы иалагӡан ргәабзиара ҭырҵааит 200-ҩык аул анхацәа,  5-ҩык урҭ рахьтә Гепатит С рыдырбалеит. 90-ҩык ахацәа ргәабзиара ҭҵаан, урҭ рахьтә быжьҩык ргәабзиара  уашәшәыроуп. Акьыба чымазара рыман хҩык. Зегьы ацхыраара рыҭан аонкологиатә диспансер аҿы, ачымазаара заанаҵы иахьаарҧшыз иабзоураны урҭ ргәабзиара шьақәгылар алшоит.

Азҿлымҳара ду арҭоит анацәа қәыҧшцәа ргәабзиара, дара рзы еиҿыркаауеит асеминарқәа, имҩаҧыргоит иҷыдоу абаҩрҵәыра – уи азы иахәҭоу аспорттә мыругақәа аахәан АНО «Алашара» агрант иабзоураны.

Аха агәабзиара ахьчаразы иреиӷьу хархәагоуп – апрофилактикеи, агәабзиара ахылаҧшреи.Аиҿкаара «Алашара» абзоурала абазатә аулқәа рҿы ицәырҵит, зегьы зҭаар зылшо аспорттә обиектқәа, уаҟа инхо зегьы алшара роуит абаҩрҵәыреи аспорти  рҽырзыҟаҵараз. Уажәы ақыҭауаа рхала еиҿыркаауеит еиуеиҧшым аспорттә еицлабрақәа, аҳамҭақәа азнархиоит «Алашара». Иҳаҩсыз ашықәс иалагӡан имҩаҧган асеиҧш аицлабрақәа фба.

АНО «Алашара» аспорт аҿиара аҟәшазы (Расул Чуков), ашықәсаз иҿыцу акакәхеит ауснагӡатә «Абаза жәлар ррекордсменцәа», убри аан ашәҟәы иҭагалоуп еиуеиҧшым аҽаршьцыларақәа рҟны 13 рекорд.

Аҟәша хаҳаралатәи аусура азхаҵахеит, «Ақыҭаҿы абаҩрҵәыра-спорттә усура иреиӷьу аиҿкааҩ» аноминациаҟны,  Расул Чуков Урыстәыла амилаҭтә спорттә  премиа ианашьара ала!

«Ҳара Ҟарачы-Черқьес мацара акәым, атәыла зегьы идҳарбеит ақыҭақәеи аулқәеи рҿы аспорт хаҳарала аҿиара шалшо», – абас ари аҳамҭа ахҳәаа азиуит Мусса Екзеков.

Урҭ роуп ҳҧеиҧш

Изеиҧшрахозеи абазақәа уаҵәтәи рымш? Еиҳарак уи зхьыҧшу иахьа ҳҿар шыҳааӡо ауп. Изызҳауа абиҧара рыгәцаракра –  «Алашара» ахықәкы хадақәа ируакуп. Ауаажәларратә еиҿкаара аҟәшақәа зегьы русура зызку ахәыҷқәа рааӡареи аҿар рыҿиареи ирыдҳәалоу аҳасабтәқәа рыӡбара ауп. Хықәкыла уи рнапы алакуп аҟәшақәа «Аҭаацәеи ахәыҷқәеи» (Нателла Джемакулова)  «Аҿар рыҿиара» (Белла Мамбетова), ари аус активла иалахәуп аҳәса рхеилакқәа (Залиха Малхозова). Ахәыҷқәеи аҿари аус рыдулараҟны еиуеиҧшым аспектқәа еидыркылоит: аҭаацәа рацәа ацхыраара рыҭара, Абазара анормақәа деилыркаара, атрадициақәа реиқәырхара, ажәлар рҭоурых аҵара, абаҩхатәра злоу аҿар ацхыраара рыҭара, арҵаратә тренингқәа рымҩаҧгара, активистцәа еиуеиҧшым арегионалтә афедералтә ҳәынҭқарратә программақәа ралахәраҟны рыцхраара, аҿар реидкылара, аволонтиортә еиҿкаара аҿиара.

– Ҳара ҳзы акраҵанакуеит, ҳхәыҷқәа, ҳҿар рхатәы бызшәа, рқьабзқәа рдыруазар, цәала-жьыла, хшыҩла иӷәӷәахар – уи зегьы аихьӡарақәа шьаҭас ирымоуп, – ишьақәирӷәӷәоит Мусса Екзеков.

Жәларбжьаратәи аидҵа «Алашара» ацхыраарала 2019 шықәсазы 46-ҩык арҧарцәеи аҭыҧҳацәеи рхы аладырхәит арегионалтә, афедералтә ҩаӡараҿы имҩаҧгаз жәохә уснагӡатә, дара иаздырхиаз асоциалтә проектқәа 4  агрантқәа ириааит. 8-ҩык ашкол аушьҭымҭацәа рыдыркылеит Москва, Ростов, КЧР иреиҳау аҵараиурҭақәа рахь. Имҩаҧгоуп аҵарадырратә блокқәа фба, урҭ рҿы аҵара иахысит 110-ҩык. Еиҿкаан аҭоурыхтә ныҟәарақәа хҧа. Аволонтиортә корпус хаҭәааит 50-ҩык рҟынӡа, урҭ ацхыраара ҟарҵоит еиуеиҧшым ауснагӡатәқәа реиҿкаареи рымҩаҧгареи рҟны. 2019 шықәсазы КЧР иреиҳау, иҷыдоу абжьарат ҵараиурҭа, актәи акурс астудентцәа рзы раҧхьаӡа акәны имҩаҧган «Посвящение в студенты», уи аҿар рзы ныҳәа духеит, иара еиднакылеит шәҩык инареиҳаны астудентцәа.

Аҟәша «Аҭаацәеи ахәыҷқәеи» аҳәса рхеилакқәеи руснагӡатә ҿыцқәа рахьтә иазгәаҳҭап апроект «Абиҧарақәа реимадара»,  уи аҳәаақәа ирҭагӡаны имҩаҧысит ауснагӡатәқәа хәба, урҭ ирылахәын жәаха инаркны ҧшьынҩажәи хҧа шықәса рҟынӡа зхыҵуаз 370-ҩык, иара убас Красныи Восток имҩаҧган абаза чара, ҳаамҭазтәи ачарақәа шымҩаҧгатәу азы ҿырҧшыгак аҳасабала, ақьабз хадақәа ирықәныҟәо. 

Ҳхалагь иҳалшо рацәоуп

2019 шықәса алкаан уаҩы иимбац абазатә аулқәа руаажәларра  иаадырҧшыз активра ала. Анхацәа рхаҭа еиҿыркааз аспорттә еицлабрақәа рыдагьы, инагӡан асоциалтә проектқәа жәпакы. Урҭ рзы аҧара еизган Абаза жәлар рмилаҭтә фонд ала. АНО «Алашара» аҟны ари ахырхарҭа ҳәаақәиҵоит Черқьесск иҟоу ахәҭа ҷыда анапхгаҩы ихаҭыҧуаҩ Мурат Гедугов. Зынӡа шықәсык ала еизган 1075828 мааҭ. Аулқәак рхы иадырхәеит дара еизыргаз аҧарақәа, ирыӡбеит уи ала рҿаҧхьа ицәырҵыз проблемақәак. Красныи Восток аӡыҭгагатә станциа еиҭашьақәдыргылеит, акыр еиӷьхеит ақыҭа ӡыла аиқәыршәара. Инжич-Чукун еилдыргеит анышәынҭрақәа, идыргылеит амыругақәа ахьырҵәахыша ахыбра. Кара-Паго ахәыҷтәы шьапылампылтә команда азы аформақәа аархәеит. Старо-Кувинск ашкол аҧхьа атротуартә плитка шьҭарҵеит. Ҧсыжи Красныи Востоки иаахәаны идыргылеит аспорттә конструкциақәа. Аусурақәа еиҳарак нарыгӡон аҭыҧантәи ауааҧсыра хәыда-ҧсада.

– Ҳара изныкымкәа агәра ҳгахьан, ҳхала ишҳалшо ҳқыҭа арҧшӡара, уаҟа анхара агәазыҳәара унаҭартә еиҧш. Иҳаҩсыз ашықәс иаанарҧшит, ауаа уи шеилыркаауа, иагьшазхиоу раулқәа рырҧшӡаразы рџьабаа адагьы рҧара алаҵара, – азиҧхьаӡоит Мусса Екзеков.

 АНО «Алашара» агрантқәа рконкурс аҿы аграждантә аҧшьгарақәа рыдгылара аусхк рхы аладырхәит 36-ҩык. Иалаҵан 33 арзаҳал, урҭ рахьтә ибзиоуп ҳәа рыхҳәаауп 12. Хпроектк нагӡоуп, егьырҭ – анагӡара иаздырхиоит.

Азакәанреи аартреи

Жәларбжьаратәи аидҵа «Алашара» аҵак ду анаҭоит имҩаҧнаго ауснагӡатәқәа зинлеи, информациалеи реиқәыршәара.

– Зегьы закәанла еиқәшәазароуп, иаартызароуп. Изҭаху зегьы алшара рымазароуп ҳусура иазку аинформациа аиуразы. Зегьы рзы ҳаартызароуп. – Абри аҩыза адҵа ықәиргылоит аиҿкаара ахада Мусса Екзеков.

Ииашаны ашәҟәқәа реиқәыршәара иахылаҧшуеит аиуристтә ҟәша. Аха аиуристцәа Маҳмуд Куртаеви Лариса Поспеловаи рнапынҵақәа рахь иаҵанакуеит хәыда-ҧсада ауааҧсыра аиуристтә цхыраара рыҭарагьы. 2019 шықәсазы дара рҟынтәи аиуристтә консультациа роуит 110-ҩык. Ацхыраара ҟарҵеит 75 зыҳәаратә шәҟәқәеи ашшыҧхьыӡқәеи реиқәыршәараҟны, 40 урҭ рахьтә ибзиоуп ҳәа рыхҳәаан, 25 мап рыцәкын,  10 рҭак макьана имаац. Ацхыраара рзыҟарҵоит иара убас абаза қыҭақәеи аиланхарҭақәеи рхадарақәагьы.

 АНО «Алашара» иазку аинформациа аиура ҟалоит, избанзар иара аусура зегьы аарҧшуп аиҿкаара  alashara.org, аофициалтә саит аҿы, асоциалтә ҳақәа зегьы рҿы, иара убас агазеҭ «Алашара»,  адаиџьест «Страна Абаза» аҿы. Аинформациа-аналитикатә еиқәыршәара аҟәша  (Георги Чекалов, Асиат Ионова) рҽазыршәоит оперативла ирымоу аресурсқәа зегьы рҟны аинформациа ацәыргара.

Шықәсык ала асаит аҿы икьыҧхьуп 200 инареиҳаны аинформациатә материалқәа.  «Жәларбжьаратәи ажурнал» аҟәшаҿы икьыҧхьуп 29 статиа. «Абиблиотека» аҟәша 2019 шықәса иалагӡаны ирҿыцуп 19 цыра ашәҟәытә, агазеҭ-журналтә аалыҵ ала. Аҟәша «Фильмотека» – авидеоаалыҵқәа 9 рыла. Асаит иаҭаауеит адунеи  86 тәыла рҟынтәи 11 нызқьҩык иреиҳаны. 2019 шықәсазы иазгәаҭоуп 19432 визит, 52479 ахәаҧшрақәа. 2019 шықәса абҵарамза инаркны асаит аҿы аусура иалагеит  абазатә уаажәларратә еиҿкаарақәа рассоциациа «Апсадгьыл» азы иаҧҵоу аҟәша.

Асоциалтә ҳақәа рҿы икьыҧхьуп 400 иреиҳаны апубликациақәа. YouTub аканал аҿы ицәыргоуп 67 видеоматериал ҿыц, имҩаҧгоуп ишиашоу ицо аефирқәа 9. Аканал АНО «Алашара»  YouTub аҟны зыҽҭазҩыз рхыҧхьаӡара шықәсык ала ҩынтә еиҳахеит. Ҳазну аамҭазы зегь реиҳа ирылаҵәоу Инстаграм аҟны аиҿкаара 14400-ҩык аҵаҩуп, егьырҭ асоциалтә ҳақәа рҿы – ҩба инаркны хәнызқьҩык рҟынӡа.

Убри инаҷыданы, АНО «Алашара» ауснагӡатәқәа жәпакы аарҧшуп арегионалтә, афедералтә массатә информациа ахархәагақәа рҟны.

Иарбоу акурс ала

 «Алашара» аусура алҵшәақәеи, уи аганахь ауаа иҟарҵо анырреи ишьақәдырӷәӷәоит, аханатә аиҿкаара ашьаҭаркҩы, уи ахада Мусса Екзеков иаликааз амҩа шиашоу.  2020-тәи ашықәс азгьы ари ахырхарҭала аусура иацҵахоит.

– Иашоуп, макьана зегьыҵәҟьа ирыдрымкылац ҳидеиақәа, иҳаҳауеит ҳганахьала иҟаҵоу акритикагьы. Иҟазар акәхап  маҷк ириашатәу усқәак. Аха инеизакны ҳара ииашоу ахырхарҭала ҳцоит, уи амҩа аныҵшьа ҳамаӡам. Ҧхьаҟа ицалатәуп, ҳусура ырҭбаауа, иҵегь еиҳаны ауаа адыҧхьало. Хымҧада ҳхықәкы анагӡара алҳаршоит! – агәра ганы дыҟоуп Мусса Екзеков.