Тобыль Тольыстан йуыс йапымшвтуата йымгIвайситI
Къарча-Черкес апны абаза бызшви литературы рфестиваль акIвшатI. Ауи ансисквша йацадыргалитI Адуней адкIылара «Алашара», Къарча-Черкес къральыгIва университет, КъЧР анауки арыпхьари рминистерства йгьи Абаза муниципал район ауысхарта. СынчIва афестиваль Тобыль Тольыстан дгIадрийищтара йцIуа асквш 140 йазынархан йгьи «Алашара» адкIылара йгIатыргаз а-Президент грант ахчала йакIвдыршатI.
Тобыль Тольыстан Закьарийа йпа – абаза уагIа дырарыпхьагIв дупI, абаза литература дащатащтIацIагIвпI, абаза бызшвала йапхъахауа ахIарыфбаквагьи апхьагаквагьи дыравторпI, абаза бызшвала йапхъахауата йыгIвуа йалагаз длитераторпI, ауи йакIвпI йапхъахауата ауагIа ршIалахIвара гIазызкIкIуа йалагаз,
ЙгIалкIгIара атахъыпI ачеркес гIвыри литератури рщаквгылра апны ауи йалацIара. Асквш 1924 агIан ауи пщысквша рурала апхьартакви агIвырагIацIщтыртакви рпны йгIадрысабапуаз, гIарып щата змаз черкес алфавит лихтI. Асквш 1925 йгIашIарышвта асквш 1932 агIандза Тольыстан черкес бызшвала йгIацIищттI 13 йнадзауата ахIарыфбаква, ахIарыфба амщтахь йызпхьауа акнигаква, арыпхьаща цхърагIагаква, асквш 1929 агIан йгIацIищттI ауысаквали, аргылчIвквали, адрама гIвыраквали йалу азкIкIра «Зули».
Асквш 1932 агIан латин щата змата йгIанйыршаз абаза алфавит андрыбагъьа амщтахь Тольыстан Закьарыйа йпа уыста йчпатI абаза бызшва архъвыхри арыпхьари, ауагIа ршIалахIвара азикIкIуа, абаза бызшвала алитература гIвыраква дрыдынхалуа далагатI. Айсра апхъала йхъазытагьи йхъазымкIвагьи ахIарыфба, абаза грамматикала апхьагаква, ахрестоматияква, ахIарыфба амщтахь йызпхьуш акнигаква 19 йнадзауата йгIацIищттI. Айсра амщтахь гIвнаука нхаракI гIацIищттI, датшагьи гIвба напIлагIвырата йрыхIазыртI, абаза бызшвала йатайкIын йгIацIищттI Чуковский Николай йхабаргIвыра «АдзыгIв атшпы йгылу атдзычкIвын», программа, тшарыщцара азкIкIра, абаза бызшвала апхьагаква, цри литературала ахрестоматияква, фольклор щата зму йара йгIвыраквагьи рыланакIуата, 12 раъара ррыхIазырри ргIацIщтри знархараз анхара далан. Асквш 1947 агIан абаза локIква йапхъахауа разкIкIра гIацIищттI, асквш 1955 агIан йбергьльу апсуа апхьахьа Щакърыл Константини йари абаза локIква йгIвбахауа разкIкIра ацгIацIырщттI.
ЙшцIасхаз апшта ансисквша абаза бызшви литератури рфестиваль наука-практика конференцияла йхъыргIвахитI. Аконференция ауагIа рарыпхьагIв йчвахъабагата «Тобыль апхьараква» – хIва йахьызпI. СынчIва афестиваль агIвынаква тшауацIырхтI, ауи йгIалалтI гвып дукI йнадзауата Апсны йауу апхьахьаква, астудентква, апхьагIвчва. Афестиваль апрограммагьи сынчIва рыцIа йцIолан: ауи йаланакIуата йакIвшатI абаза бызшвали литературали арыпхьагIвчва ъазаква рмастер-классква.
Октябрь а 24 атшын АлбыргIан квтанай апхьарта апны цри бызшвали литературали йхътIу гIвапхьарасахIаткI акIвшатI. АпхьарасахIатква шакIвшуз йалапштI апрофессор ПIаз Сергей, Къарча-Черкес республика арыпхьагIвчва рдырраква йъарыладырхIауа аинститут къабард-черкес йгьи абаза бызшвакви литературакви ркафедра аунашвачпагIв ХIасарокъва Бильаль, Къарча-Черкес агуманитар наукаква ринститут абаза хъвшара аунашвачпагIв Дзыба ГIайщат, Абаза муниципал район ауысхарта арыпхьари акультури рунашвахъцIарта аунашвачпагIв Мартаза Зимфира, абаза бызшвали литературали Абаза район апхьартаква рарыпхьагIвчва, «Алашара» адкIылара анхагIвчва.
9 акласс апны абаза бызшвала апхьарасахIатI акIвзыршаз Шхай Аминат лакIвпI. Апхъапхъа ауи йлырхъвыхтI асабиква йызхъысыз атема – йбергьльым хъата зму ажванахъаква – шрыларкIыз. АпхьагIвчва рызджьакI атест хачIвква рыквшватI, ауат руыс ъадзадырхъйуз арахьарат пынхачIвыта йырчпаз атшарыщцара йгIалхыз ажванахъаква йрыдынхалуан. Акласс сасчва щарда ъагIвназ йгIалцIла асабиква рхъагвы анаквымыз гIаншун, йсакъуа рнапIква щтIырхуан, рбыжьква щаквкIчвата джьауап артуан. Ауаса рджьауапква таразын, ауи ахIатырла Аминат Ращид йпхIа рынхаща дшазыразу ралхIвтI.
Ауи амщтахь алексика йадынхалуа йалагатI: апхьагIвчва рыцIа джьгарта йгIархIвун ауагIа ршIалахIвара йгIалху ажвацгIайква йгIарныцIуа, урышв бызшвалагьи йатаркIуан. ЙащтагIайуата арыпхьагIв ажванахъа алачпаква йырзынархаз атема шIыц гIаргвынлыргIвуа далагатI. ЙшгIацIцIызла, апхьагIвчва урышв бызшвалагьи йара ари атема йахъысуан, ауи ахIатырла арыпхьагIв луыс рыцIа ймайрахатI. Ауи йаквшахIатхатI апхьарасахIат ацIыхъва акласс йыргIвыз алацIара тшыт. ЗалацIараква йгIарыпхьаз гIвпхIвыспачкIвынкI йгIадырбатI ажванахъа алачпа ззырхIвауа, ауат ачважвара апынгьи агIвыра апынгьи ргIарысабапща бзита йшгIаргвынгIвыз.
АпхьарасахIат атема хъада йапщыламыз ахачIвквагьи гIагылуан. АрыпхьагIв йлырхъвыхтI асабиква абазала апхьадзара шырдыруа. ХачIвыта йгIалырбаз апхьадзараква абазаква ртурых апны магIны зму асквшква гIарныцIуан. АпхьагIвчва асквшква йгIарныцIуаз агIаншараква гIархIван ауи ахачIвгьи дахIврала йдырхъйатI.
Ауи йгIалцIла Аминат Ращид йпхIа йылгвапата апхьагIвчва лыртшхъватI, рыцIа бзита йынхаз рыхьызква гIалылкIгIатI, уадыргIвана пынхачIвгьи адзын тшпсщара мшква рагIан йыздынхалуаш ахачIвквагьи рылттI.
Цри литературала апхьарасахIат ЙынджьыгьчкIвын апхьарта йхвбахауа акласс апхьагIвчва рпны арыпхьагIв Асанай ФатIима йакIвлыршатI. Апрограмма йшгIанарбауала, йхвбахауа акласс йапхьауа асабиква абаза уагIа шIалахIварагьи тшахадыргIвазитI. Асабиква аэкран апны йгIанарбуз алокI фырква рсуратква шгIардырхуазла йгIауахвырквын ауат бзита йрыхагIвазапI афольклор гIвыраква, ажва ахъазла, «Амлыкви акъыльи», «Алыгажв йпхIа ахI дшйайгIайыз», «АпхIвыспа пшдзи ахыгIв анбжьагIвчви», «Алыгажви ахвымбырцIакIьи». РахIа йхъадугьи, алокIква гвыбзыгъарата йгIауыларцIауа гIаргвынгIвитI.
Апрограммала йащтагIайуа локIта апхьагIвчва зхъысра атахъыз «Айныжвпа» акIвын. Асабиква алокI шIыц йахалыргIвазара апхъала арыпхьагIв атекст апны узынйауа жвыра зхьыз ажваква йгIарныцIуа гIаргвынлыргIвытI. АлокI ашIчIваракI дангIапхьа амщтахь ФатIима МухIамад йпхIа ауи акласс йшгIаргвынгIвуа лырхъвыхтI. Асабиква йгIадырбатI алокI гIазквчважвауа йахъазымкIва ауи йгIанахIвауа абжьагажвагьи шгIаргвынгIвуа: Айныжвпа йан йылхIваз дъахъысыз, йаба дйамакIта дъайайсыз ахъазла ддырджьатI. УадыргIвана асабиква апхьаща йшазъазу гIадырбауата кьазу-кьазу алокI ашIчIвараква йгIарыпхьатI, апхьарасахIат ацIыхъва ауи йалу афырква рыла йшгIацIарыжьуаз апшта рсуратква рчпатI.
АпхьарасахIат алгауата асабиква арыпхьагIв лразыра ажваква йрыздзыргIвытI, атшпсщара мшква рагIан пынхачIвыта йрыму гIаддырдырын тшпсщара йджвылцIтI.
Асасчва датшагьи джьащахъваракI рызпшуан – абжьарасахIат. АрыпхьагIвчва Къвач ГIайщати Меремкъвыль Мадини ащхъа цIасква знархару аргылчIв йгьи Тобыль Тольыстан йпьеса «Зарыльа» апхьагIвчва ркъарула йдрыхIазырын йгIадырбатI. АпшыгIвчва агIахъвмарыгIвчва шIаква йырзыразта напIасра дула йнардастI.
ЙакIвшаз апхьарасахIатква рунашва гIайрахауата ПIаз Сергей йшгIаликIгIазла, апхьагIвчва бзита йынхун, гьшIыгъьра гьрымхьтI, ргвы аквкIта арыпхьагIвчва йрыздзыргIвуан, азцIгIараква джьауап рыртуан.
– Йхъаду ари акIвпI: асабиква гвыбзыгъапI, абаза бызшва бзита йырдыритI. Арат рапш апхьагIвчва анаъазара уызцынхушгьи уыздынхалуашгьи уауаштI, – йхIватI ауи йцIыхъвахауата.
АлбыргIан апны йакIвшаз йхътIыз апхьарасахIатква сынчIва абаза бызшви литератури рфестиваль гIахъыртIытI. ЙащтагIайуаз атшын, октябрь а 25 агIан, Черкесск 16 агимназия апны афестиваль анкъвакъвраква акIвшатI. Анкъвакъвра апрограмма йалан уыса апхьара, алацIара агIвра, абаза бызшвали литературали олимпиада. Анкъвакъвраква йрылан чкIвынргIа 200-гIв раъара йнадзауата: аквтанай апхьартаква рапхьагIвчва, Къарча-Черкес педагогика колледж йапхъахауа акурс астудентква. Ауат хIвахIвра ажвала тшырзынадырхатI апроект аунашвачпагIв, КЧГУ апроректор ПIаз Сергей, КъЧР анауки арыпхьари рминистр лтарагылыгIв Бекижева ФатIима, Абаза муниципал район ауысхарта арыпхьари акультури рунашвахъцIарта аунашвачпагIв Мартаза Зимфира, Апсны акъральыгIва университет арыпхьагIв ахIба Анкваб Ахра, Гвыдауыта къала 2 аквтанай апхьарта аунашвачпагIв Рыста Людмила.
Анкваб Ахри Рыста Людмили анкъвакъвра йаларжьырныс йрыцгIардтI Апсны акъральыгIва университет астудент айцIбачва пщгIвы йнадзауата йгьи Гвыдауыта 2 аквтанай апхьарта апхьагIвчва ахIбачва пщгIвы. Ауат уыса гIапхьарала анкъвакъвра дрыпшдзатI. Ауи аъара бзита, йазычпата ауысаква йгIарыпхьатI йгьи ашва рхIван гвыгIвбара гIандыршатI: атеатр йауу артистумищтIхIва.
ЦIабыргыта, Къарча-Черкес апхьартаква рапхьагIвчвагьи ауысаква бзита йгIарыпхьатI. Ауи ахIатырла ажюри апхъагылагIвчва гIадрыбергьыльра ахъазла бзита рхъа ташытI.
Анкъвакъвраква рапхъагылагIвчва рыхьызква ноябрь а 1 атшын анаука-практика конференция «Тобыль апхьараква» апычIв алачIвара апны акIвпI йъагIархIваз. ЙгIвбахауа, йхпахауа агылартаква зкIыз адипломкви асогIакви рыртI, зныбыжьла йайцIбу айгIайыгIвчва ахча согIатгьи рыквшватI. Акласс ахIбачва йрыуата йапхъагылагIвхаз асквш 2020 июль мыз агIан Апсны амшын атшпы апны йадыргалуа абызшва тшпсщарта йшырщтиуаш гIазырцIабыргуа ашвъаква рырттI.
– Ужвы асахIат ауи апш согIа ззыщаквхIыргылыз апхьагIвчва ахIбачва ракIвпI, йауа ухIварыквын ауат паспорт гIарыртхьатI, дара-дара акъраль гIвына йахъысныс рылшуштI, – йрытамамтI ПIаз Сергей.
АлацIараквала анкъвакъвра апны йапхъахауа агвып (5-8 аклассква) рпны йапхъахауа агыларта гIатылгатI Мала-АбазинскI аквтанай апхьарта апхьагIв Шхай Элина, йгIвбахауа агыларта – Гвымлокт Кълыч Р.Н. йыхьыз зхъу йхпахауа аквтанай апхьарта апхьагIв КIвакIва Амиран, йхпахауа агыларта – ЙынджьыгьчкIвын йауу Бльанауа Диана.
АхIбачва рпны алацIараква рыгIврала гIвыджь айгIайтI – Харцыжв Милана (АлбыргIан) йгьи Пшауына Мадина (Гвымлокт). ЙгIвбахауа агылартагьи гIвыджь йырквнадыргатI – Късал Айна (АлбыргIан) йгьи ХIачвыкъва Альимран (Черкесск къала 17 агимназия). Йхпахуз асогIа лыквшватI Хъвыжвду йауу Ашба Льильа.
Афестиваль йъагIалалыз, алацIараква джьащахъвата йъаргIвыз ахъазла йазалху артшхъвагаквала датшагьи хгIвы гIалыркIгIатI – Дармыва Льильа (ХъвыжвчкIвын), Аджьбакь Амина (Гвымлокт) йгьи Хъабльахь Светлана (Псыжв, 2 апхьарта).
Йапхъахауа агвып (5-7 аклассква) рпны зымгIва рацкIыс бзита олимпиада ахачIвква дырхъйатI Ажьи Альийа (ЙынджьыгьчкIвын), Хъабльахь Милана (Гвымлокт) йгьи КIам МухIамад (АлбыргIан).
ЙгIвбахауа агвып (8-9 аклассква) рпны бзидздзата тшгIадырбатI Черкесск апхьартаква рапхьагIвчва ХвытI Дайана (11 арыпхьара квта), ХвытI Альихан (17 агимназия) йгьи МалхIваз Милана (5 агимназия). Йхпахауа агыларта зкIыз дрыуапI Къарапагва йауу ХIаратокъва Сальимагьи.
АхIбачва рквтала акъала апхьартакI йапхьауа Кълыч Амина (9 агимназия) йхпахауа агыларта лкIытI. Араъа йапхъахауа асогIа гIатылгатI Къарча-Черкес педагогика колледж апхьагIв Айсан Радима, йгIвбахауа агыларта – Ардзынба В.Г. йыхьыз зхъу Къарапагва арыпхьара квта апхьагIв КIвращын Джьамильа.
Уыса апхьарала анкъвакъвра апычIв классква рапхьагIвчвагьи алан. Ажюри йшырпхьадзазла, апхьагIвчва хвыцква рпны зымгIва рацкIыс уыса бзита дгIапхьатI Къвбина йауу Тльауыж Арианна. ЙгIвбахауа агыларта йкIытI Черкесск 15 агимназия апхьагIв Дагвжвей Арсен, йхпахауа агыларта – Псыжв 1 агимназия апхьагIв Утегушева Дарина.
5-8 аклассква рапхьагIвчва рквтала ажюри рыцIа йыргвапхауата йгIалыркIгIатI Шармат Саида (Гвымлокт), Апса Амаль (Псыжв, 1 агимназия) йгьи ЛабгIва Лиана (Хъвыжвду).
АхIбачва рпны ажюри йгьырзалымхтI АлбыргIан йауу Къвач Мыхвтари Гвым йауу Тебердыкъва Альини. АгIвыджьгьи йапхъахауа агыларта рзагIвыршатI. ЙгIвбахауа агыларта лквнадыргатI Къахвын Зальина (апедагогика колледж), йхпахауа агыларта – Чыкъ Альим (Псыжв, 1 агимназия).
АдгалагагIвчва датшагьи гIвыджь артшхъвага швъаква рквнадыргатI – ШвхIагващ Ризуани (Псыжв, 2 апхьарта) Дзыба Амини (Хъвыжвду).
Артшхъвага швъаква рквнадыргатI Апсны йауаз асасчвагьи – ауат абаза йгьи апсуа уысагIвчва руысаква йангIарыпхьуз йгIадырбаз артист ъазари анадзари зымгIвагьи йджьарщатI: Гвыдауыта къала 2 апхьарта апхьагIвчва Герзмава Инар, Квланба Денис, Отырба Элиф, Таркьыл Аминат йгьи Апсны къральыгIва университет астудентква Арахамиа Диана, Дгебуладзе София, Псардиа Алхас йгьи ашва гIазхIваз Сангулиа Саид.
Адгалра комитет анкъвакъвра апхъагылагIвчва йрыдынхалыз арыпхьагIвчвагьи афестиваль акIвыршара йацхърагIаз арыпхьагIвчвагьи рыхьызква гIархIватI.
Йара аконференция анхара йалан апхьахьаква, апедагогква, абаза бызшвали литературали аъачIвагIагIвчва, ХIабаз район йауата черкес бызшвала арыпхьагIвчва ргвып йгьи Апсны йауата рхъвыхыгIвчва гвып дукI. Аконференция йгIадгылтI ажвлара уыснкъвгагIвчвагьи – ажвлара мгIвайсра «Адыгэ Хасэ» аунашвачпагIв Асланов Али, абаза жвлара адкIылараква рассоциация «Апсадгьыл» ауысхагIвчва.
Аконференция йгIадгылыз зымгIва злаз алачIвара Абаза район азал ду апны йакIвшун. Ауи гIахъитIытI йгьи йакIвйыршатI Къарча-Черкес къральыгIва университет апроректор, апрофессор ПIаз Сергей. ХIвахIвра ажвала аконференция йалаз тшырзынадырхатI Абаза муниципал район ауысхарта ахъада Ныр МухIаджьыр, КъЧР анауки арыпхьари рминистр лтарагылыгIв Бекижева ФатIима, КЧГУ аректор Узденов Таусолтан. Ауат йшгIалыркIгIазла, аконференция лшара шIыц щарда гIаннаршауата магIны ду амапI анаука-педагогика ацынхара апны. Таусолтан Аубакьыр йпа Къарча-Черкес ауагIахъаква рыбызшваквала ауниверситет йгIацIырщтуа йджвыквырцIаз алитература-публицистика журналква «Абазашта адзыхьква» (абаза бызшвала) йгьи «Хэку» (черкес бызшвала) гIайырбатI. Апхьахьаквагьи аъачIвагIагIвчвагьи согIата атипография йгIацIыргахгIвацаз ажурналква закIы-закI рзыршатI.
«Алашара» адкIылара авице-президент Мыхц Рамазан адкIылара апрезидент Эгьзакь Мусса йхIвахIвра тшазынархара дгIапхьатI. Абаза бызшвали черкес бызшвали агIвыри алитератури рщаквгылра апны Тобыль Тольыстан йалацIара айшыста дгIаквчважван ауи анаука йгьи апедагогика жвлара рпахь йгылу ахачIвква дрыквгIашIастI.
– МагIны ду зму ари акIвпI: Тобыль Тольыстан дгIахIгвалашвахта йквнагауа апIатIугIваца апны хIгIанымхауата дгIазлагаз ауыс нахIырдзахырныс, ауи йапшта хIыбызшвагьи хIкультурагьи бзи йыгIбауата йгIадзынгылуа абанпараква абари абайара рызгIаныгIжьырныс. ЙалкIгIата, абаза бызшвала швара аъачIвагIагIвчва, апедагогква, апхьахьаква, алитераторква швакIвпI ари ауыс архъйара апны залацIара хъаду. Швара швакIвпI хIцIаскви хIхабзакви ргIахчара йащату хIыбызшва атшауацIнарыхра апны зымчи зылшари хIаракIу. ЙшвзыстахъпI швынхара апны дахIвра щарда, йхъасцIитI швырхъвыхракви швпышви ансимш наука йгьи педагогика нхара апны джьгарта йшшвзыгIарбуш, – йхIватI Мыхц Рамазан.
Аконференция апычIв алачIвара апны йауацIыхта йгIачважватI: афилология наукаква рдоктор Дзидзариа Отар – ауи апсуа йгьи абаза литератураква рыщатащтIацIагIвчва Гулиа Дырмыти Тобыль Тольыстани рбзазара йгьи анаука апны рынхара дгIаквчважватI; афилология наукаква рдоктор ХIаратокъва Марйат – абаза бызшва апны агIвычIвгIвыс пIатIу йыквцIара знархару ажважвква лырхъвыхтI; Черкесск къала амэрия арыпхьарала аунашвахъцIарта аъачIвагIагIв хъада Агырба Хаджьат – ареспублика акъала хъада апхьартаква рпны цри бызшвала арыпхьара аъащи анадзари йырзынарху агIарбара джьащахъваква гIалхIватI; атурыхдырра наукаква ркандидат Курмансеитова Аминат – Октябрь революция апхъала абазаква гIвыра шгIацIырщтуаз даквгIашIастI. ЙцIыхъвахуз агIачважвара амакIыра тшыткI гIахъшахъыцIтI атерминква йгIарныцIуала аквымшвара ъагIаншаз ахъазла.
Атшпсщара сахIат амщтахь аконференция йалакваз АлбыргIан апхьарта апны хгвыпкIта тшыршан абаза йгьи къабард-черкес бызшваква, литератураква, афольклор рырхъвыхрала абаргвыраква йрылачважватI. Аконференция апрограмма гIачважвара 50 райхIа алан, ауат рызбжа йгIвыта йгIадыргалтI, анатгьи аратгьи аконференция аматериалква разкIкIра йалата йгIацIцIуаштI.