«Абазгьква» райгIайраква рыгIамта
Асквш 2019 агIан Псыжв кыт атопасыгIвчва гвып «Абазгьква» Къарча-Черкес йачемпионхатI. Ауат матч 20 акIвдыршатI, ажвиц рпны йайгIайтI, апщба рпны йызцасуази дари ргIарбараква аъарахан ареспублика апхъагылара йалалыз ажвиз гвыпкI рквтала зымгIва йрагъьта тшгIадырбатI. Абараса агIахъвмарыгIвчва йдыртлапIатI цIыпх Псыжв футбол йахъыцIыз асквш 70 аюбилей. ЙгIалхIкIгIапI Къарча-Черкес ачемпионатква ртурых апны Псыжв ргвып йгIатыргаз абари айгIайра йшгIважви гIвбахауа.
Псыжв кыт афутболасыгIвчва гвып асквш 1949 агIан йгIандыршатI, ауи амщтахь асквш 1955 агIан Россия АгIвадахь Спартакиада апны йайгIайтI. Сквшы 70 рурала агвып хIышта ачемпионатква рпны 22-н йъапхъагылагIвхаз йахъазымкIва 11-н йгIвбахауа агыларта ркIытI, 20-ны а-Кубок гIатыргатI, гIван – ареспублика а-Суперкубок. Асквш 1995 агIан Прикубанск район ахьызла йгIахъвмаруата агвып совет уагIа Абашта айсра Ду апны йгIатыргаз АйгIайра йахъыцIуаз асквш 50 йадахIвуата йакIвшуз а-Спартакиада апны йапхъагылагIвхатI. Асквшква 2006 йгьи 2007 рагIан апсыжвква КъЧР апрезидент й-Кубок гIатыргатI. Асквш 1990 йгIашIарышвта ауат Къарча-Черкес апны йакIвшаз турнир 23 рпны апхъыгылара гIатыргатI.
Агвып рюбилей сквшы датша айгIайралагьи йдыртлапIатI: 18 гвыпкI злаз мини-футболла ареспублика турнир апны, Късал Азамат йыхьызла АлбыргIан апны йакIвшаз атурнир апны, агвып йрылата йасуаз, ауаса самбо абакIрала згIатгараквала рыцIа йбергьыльхаз Къвныжв МухIамад йхъмаштылра знархараз атурнир апны.
Ачемпионат апны «Абазгьква» йгIатыргаз апхъагылара лшара гIарнаттI анахьанат аштаква рчемпионква рквтала Лагъь КIавкIаз а-Кубок йазабакIырныс. Йайрышдзаз апшIагылра апны ауат Цхинвал йауаз атопасыгIвчва апхъагылара рчвыргатI – 2:3.
Псыжв ртопасыгIвчва гвып уахьчIвала рпсы швабыж йгIатайкIитI ркапитан Льау Рустам. АйгIайраква йхатI ду рылайцIитI йагъьу агвыквсыгIв Табыщ Артур. Акапитан дйыдзхъагылата апсыжвква ртшыхчара йрыбагъьитI Гвагвы Вадим, атопасырта аквта рылапш гьахъырхуам Муратыкъва Альберт, Хъакъвыпщ Нурдин, Табыщ Мурадин. РапхъагылагIвчва швапха гIархъырхуа топ йаситI агвып шабгу. Ауи ацзакIыра акIвпI йаргьи айгIайра дуква щъата йырзалуа.
Ужвы «Абазгьква» агIамта шIыц тшаздрыхIазыритI. ХIрайхIвахIвитI – сынчIвагьи Псыжв футбол ацIас пшдзаква надырдзауата йрымазтI ауат адахIвра дуква.