Абазгаа риааиратә сезон
Ҧсыж аул аҟынтәи ашьапылампылтә команда «Абазгаа» 2019 шықәсазы Ҟарачы-Черқьес иачемпионхеит. 20 еиҧылара мҩаҧганы, урҭ рҟны 16-нтә аиааира ганы, даҽа ҧшьынтә еиҭахарала ихәмарны, ҧсыжаа ареспубликатә аҧхьахә агара иалахәыз 11 коллектив рахьтә зегьы иреиӷьхеит. Убас, ахәмарцәа иазгәарҭеит ҵыҧхтәи аныҳәа – ҧсыжтәи ашьапылампыл 70 шықәса ахыҵра. Иҳәатәуп ари аиааира шҩажәиҩбатәиу Ҟарачы-Черқьестәи ачемпионат аҿы, Ҧсыжтәи акоманда аҭоурых зегь аҟны.
Ҧсыж ашьапылампылтә команда еиҿкаан 1949 шықәсазы, 1955 шықәсазы аиааира агеит Алада Урыстәыла Аспартакидаҿы. 70 шықәса рыҩныҵҟа аобласти ареспубликеи рчемпионатқәа рҟны, 22 иааира рыдагьы, 11-нтә аҩбатәи аҭыҧ ааннакылахьан. 20-нтә Акубокқәа агахьан, ҩынтә – ареспублика асуперкубокқәа. 1995 шықәсазы акоманда Ҟәбинамҵантәи араионқәа рыхьӡала, Аиааира Ду 50 шықәсахыҵра иазкыз Аспартакиадаҿ аиааира агеит. 2006-2007 шықәсқәа рзы ҧсыжаа аҧсахеит КЧР Ахада икубок. 1990 шықәса инаркны Ҟарачы-Черқьес имҩаҧысуаз атурнирқәа 23 рҟны аҧхьагылара рыман.
Аиубилеитә шықәса азгәаҭан, убасгьы 18 команда злахәыз ашьапылампыл маҷ азы ареспубликатә турнир аҟны, Ельбурган, Азамаҭ Ксалов игәаларшәара иазкыз, акоманда ҧасатәи ахәмарҩы Мухамед Кунижев игәаларшәра иазкыз атурнирқәа рҿы аиааирақәа рыла.
Ачемпионат аҟны актәи аҭыҧ агара, «Абазгаа» алшара рнаҭеит арегион ачемпионцәа рыбжьара идырхәмаруаз Нхыҵ Кавказ акубок аҽалархәра. Хацәынмырхалатәи аиндаҭлараҿы аиааира рцәыргеит Цхинвалаа – 2-3 ҳәа.
Ҧсыж уажәтәи акоманда ҧсыс иахоу, иара акапитан Рустам Лиаув иоуп. Аиааираҟны илагала дууп, зегь реиҳа ампыл ҭазыршәуа Артур Габишев.
Ахьчараҿы акапитан дивагылоуп Вадим Гогов, адәы агәҭа иахылаҧшуеит Альберт Муратков, Нурдин Какупшев, Мурадин Табишев. Раҧхьагылаҩцәа ирываҟәалоит акоманда зегьы, уи ауп риааирагьы зыбзоуроу. Уажәы «Абазгаа» асезон ҿыц рҽазыҟарҵоит. Ирзеиӷьаҳшьап, сынтәагьы, ҧсыжтәи ашьапылампыласыҩцәа атрадициақәа рыцҵара.